अब कोरोना विरामीको उपचार निशुल्क हुने - Nigranitimes

अब कोरोना विरामीको उपचार निशुल्क हुने

कात्र्तिक २१ गते, काठमाडौ । कोरोना संक्रमितको उपचार फेरि निःशुल्क हुने भएको छ । सरकारले यसअघिको निर्णय सच्याएर उपचार पुनः निःशुल्क गर्ने व्यवस्था गर्न लागेको हो ।

कोरोना संक्रमितको उपचार निःशुल्क गर्नु भन्ने परमादेश पुनरावलोकन गर्न स्वास्थ्य मन्त्रालयले दिएको निवेदन सर्वोच्च अदालतले अस्वीकृत गरेपछि सरकारले नयाँ प्रस्ताव मन्त्रिपरिषद्बाट पारित गर्ने तयारी गरेको हो । सर्वोच्चको फैसला अनुरुप नै अबको प्रस्तावमा कोरोना संक्रमितको उपचार निःशुल्क गर्ने गरी पूर्व निर्णय सच्याउन लागिएको छ ।

यसअघि सरकारले निःशुल्क उपचार गर्दै आएकोमा सक्नेले उपचार शुल्क आफै व्यहोर्ने गरी नयाँ निर्णय गरेको थियो । त्यसविरुद्ध सर्वोच्च अदालतमा रिट परेपछि निःशुल्क उपचार गर्नु गराउनु भनी आदेश जारी भएको थियो । सरकारले उक्त फैसला पुनरावलोकन गर्न निवेदन दिएकोमा बिहिबार खारेज गरिदियो ।

सर्वोच्च अदालतले यसअघि संक्रमितको उपचार निःशुल्क गर्न नसकिने भन्ने सरकारो निर्णयलाई गलत ठहराएपछि सरकारमाथि उपचार निःशुल्क गर्नुपर्ने वाध्यात्मक अवस्था बनेको थियो ।

१५ असोजमा सर्वोच्चको फैसला उल्टाउन स्वास्थ्य मन्त्रालयले सर्वोच्च अदालतमा पुनरावलोकनको निवेदन दर्ता गरको थियो । न्यायाधीशहरु हरिकृष्ण कार्की, सपना मल्ल प्रधान र पुरुषोत्तम भण्डारीको इजलासले फैसला पुनरावलोकन गर्न नपर्ने भनी आदेश जारी गरेपछि सरकारले मन्त्रिपरिषद्बाट पुरानो निर्णय सच्याउने तयारी गरेको हो ।

सम्बन्धित खवर