पुस १६ गते, पथरी । मोरङको पथरी शनिश्चरेमा उद्योग, पर्यटन तथा आपूर्ति मन्त्रालय मार्फत चालु आर्थिक वर्षमा गरिवी निवारणका लागि लघु उद्यम विकास कार्यक्रमको कार्ययोजना तय भएको छ ।
नगर प्रमुख एवम् नगर उद्यम विकास समितिका संयोजक दिलीपकुमार राईको अध्यक्षतामा सम्पन्न समितिको बैठकमार्फत कार्ययोजना तय भएको हो । मन्त्रालयबाट प्राप्त २५ लाख रुपैयाँ अन्तर्गतको कार्यक्रमका लागि वडा नम्वर १, २ र ३ लाई छनौट गरिएको नगर प्रमुख राईले जनाए ।
उनले नगरको पहिचान झल्किने प्रकारका लघु उद्यम प्रवद्र्धन समेत गर्दै तोकिएको कार्यक्रमलाई प्रभावकारी रुपमा सम्पन्न गर्न सम्वन्धित वडाका आर्थिक विपन्नहरुको सहकार्य र सहयोग आवश्यक रहेको बताए ।
लघु उद्यम विकास कार्यक्रम सञ्चालन स्वीकृत निर्देशिका २०७७ बमोजिम तयार कार्ययोजना नगर कार्यपालिकामा स्वीकृतिका लागि पेश गरिने बैठकले निर्णय गरेको छ । बैठकमा, प्रमुख प्रशासकीय अधिकृत अम्बिकाप्रसाद धमला, आर्थिक विकास समिति संयोजक यामप्रसाद गुरागाईं सहितको सहभागिता रहेको थियो ।
नगरले नियुक्त गरेका उद्यम विकास सहजकर्तामार्फत वडाका वस्तीमा गई सहभागितामुलक ग्रामिण लेखाजोखा विधिबाट आर्थिक विपन्न वर्गको पहिचान गरी ७० प्रतिशत महिला समेत ८० परिवारका लागि कार्यक्रम सञ्चालन गरिने छ ।
यसका लागि अघिल्लो वर्ष वडा नम्वर ४, ५ र ७ मा सञ्चालन भएको कार्यक्रममा सहभागि ४१ परिवारलाई स्तरोन्नतीको योजना समेत रहेको छ । कार्यक्रमका लागि वरिष्ठ उद्यम विकास सहजकर्ता सपना कार्की र उद्यम विकास सहजकर्ता भगवती कटुवालले सहजिकरण गर्नेछ ।
