साउन १९ गते, पथरी । मोरङको पथरीशनिश्चरे नगरमा वैकल्पिक विधिबाट पठनपाठन गराउने विषयमा छलफल भएको छ । कोरोना भाइरसको संक्रमणका कारण प्रत्यक्ष पठनपाठनमा समस्या भएपछि नगरका सामुदायिक विद्यालयका प्रधानाध्यापकहरुको छलफल भएको हो ।
मंगलबारको वैठकले कोरोना संक्रमणका कारण भौतिक उपस्थितीमा पठनपाठन गर्न सम्भव नभएकाले सवै विद्यालयले कस्तो कस्तो वैकल्पिक विधिबाट पठनपाठन गर्न सहज हुन्छ, सोही अनुरुप पठनपाठन अघि बढाउने निर्णय भएको हो ।
केहि विद्यालयहरुले अनलाइनमार्फत पठनपाठन सञ्चालन गरेको र वाँकीले समेत उपयुक्त वैकल्पिक विधिबाट पठनपाठन थाल्न र नगर शिक्षा शाखामा सो को जानकारी गराउने निर्णय भएको शिक्षा अधिकृत नविन खुलाल बुढाथोकीले जनाए ।
वैठकले, भदौ १५ गते भित्रमा विद्यालयहरुको तथ्याङक अद्यावधिक गर्ने इआइएमआइएसको नयाँ स्वरुपमा विद्यालयका आवश्यक सम्पूर्ण विवरण अपलोड गरिसक्नु पर्ने पनि निर्णय भएको उहाँले जानकारी गराए । त्यसैगरी, विद्यालयहरुले वुझाउन वाँकी रहेको आफ्नो प्रगति विवरण भदौ मसान्तभित्र वुझाइसक्ने पनि वैठकले निर्णय गरेको छ ।
नगर शिक्षक महासंघका अध्यक्ष अर्जुनकुमार वुढाथोकीको अध्यक्षता तथा नगर शिक्षा शाखा प्रमुख शालिग्राम काफ्ले र सामाजिक विकास समितिका सदस्य भद्रमान विश्वकर्माको आतिथ्यतामा वैठक सम्पन्न भएको थियो ।
