भदौ ११ गते, कानेपोखरी । मोरङ कानेपोखरी –६ स्थित बरगाछीमा रहेको दिगोपन सामाजिक उद्यमी महिला सहकारी संस्थाले आफ्ना सेयर सदस्यहरुलाई आधुनिक कृषि यन्त्र तथा उपकरणवितरण गरेका छन् ।
शुक्रबार संस्थामा बृह्रद कार्यक्रमको आयोजना गरी हेफर इन्टरनेशनल र अभियान नेपालको सहयोगमा संस्थामा आवद्ध कृषकहरुलाई ४ वटा पावर टिलर र एक वटा थ्रेसर वितरण गरेको हो । आधुनिक कृषि यन्त्र पावर टिलर वडा नं. २ बाट मुक्तिनाथ समूहकी मुना कार्की, वडा नं.४ बाट सुनगाभा समूहकी सुनीमाया राई र हातेमाले समूहकी तारादेवी घिसिङ र वडा नं. २ बाट चन्द्रसूर्य समूहकी दीपा न्यौपानेले पाएका छन् । कृषकले १ लाख ३० हजार र संस्थाले १ लाख गरी जम्मा २ लाख ३० हजारको साँझेदारीमा संस्थाले पावर टिलर(हाते ट्रयाक्टर) कृषकलाई प्रदान गरेको छ ।
त्यसैगरी वडा नं. ४ बाट सौगात समूहकी टंकमाया मगरले थ्रेसर प्राप्त गरेकी छिन् । ५० प्रतिशत अनुदानमा टंकमायाले थे्रसर पाएकी हुन । थ्रेसरलाई ३ लाख ७० हजार परेको थियो । हेफर इन्टरनेशनल र अभियान नेपालले दिगोपन संस्थालाई ७७ हजारको टिभी र ८ हजारको माटो परिक्षण गर्ने यन्त्र पनि प्रदान गरिएको थियो ।
कार्यक्रमका प्रमुख अतिथि गाउँपालिका उपाध्यक्ष भोला अधिकारी, विशेष अतिथि हेफर इन्टरनेशनलका क्षेत्रीय कार्यक्रम प्रवन्धक दिपेश पोख्रेल, विषेश अतिथि संविधान सभा झापा सदस्य प्रेम गिरी र संस्थाकी अध्यक्ष उमा राना मगरले सो आधुनिक कृषि यन्त्र तथा उपकरणको हस्तान्तर गरेका थिए ।
कार्यक्रममा संस्थाकी अध्यक्ष उमा राना मगरले संस्थाको प्रगती, कारोबार र वर्तमान अवस्थाका बारेमा प्रस्टाएका थिइन् । कार्यक्रममा गाउँपालिका उपाध्यक्ष भोला अधिकारी, विशेष अतिथि हेफर इन्टरनेशनलका क्षेत्रीय कार्यक्रम प्रवन्धक दिपेश पोख्रेल, विषेश अतिथि संविधान सभा झापा सदस्य प्रेम गिरीले शुभकामना मन्तव्य राखेका थिए ।
कार्यक्रममा अभियान नेपाल झापा कार्यक्रम संयोजक हेम श्रेष्ठ, केशव खनाल र हेफर प्रोजेक्ट नेपालका अन्जु सिग्देल पनि कार्यक्रममा अतिथि रहेका थिए ।
