२८ कार्तिक, विराटनगर । आगामी स्थानीय तह निर्वाचनको तयारीमा जुटेको सत्तारुढ राष्ट्रिय स्वतन्त्र पार्टी (रास्वपा)लाई कोशी प्रदेशका कतिपय स्थानीय तहमा वडाध्यक्षका उम्मेदवार खोज्नै सकस देखिएको छ । पार्टीले सञ्चालन गरेको ‘क्यान्डिडेट क्लब’मा प्रदेशका १३७ स्थानीय तहमध्ये ४१ पालिकाबाट वडाध्यक्ष बन्न एक जनाले पनि नाम दर्ता गराएका छैनन् ।
एकातिर स्थानीय तहका प्रमुख पदमा पुग्न चाहनेहरूको आकर्षण देखिँदा अर्कोतिर वडा तहको नेतृत्व लिन इच्छुकहरूको अभाव देखिएको हो । विशेषगरी पहाडी र हिमाली जिल्लाका पालिकामा वडाध्यक्षका आकांक्षी नदेखिँदा रास्वपाको संगठन विस्तार र चुनावी तयारीमाथि प्रश्न उठेको छ ।
पार्टीको आधिकारिक विवरणअनुसार प्रदेशका ९६ पालिकाबाट वडाध्यक्षको उम्मेदवार बन्न १ हजार ८२ जनाले नाम दर्ता गराएका छन् । तर, बाँकी ४१ पालिकामा एउटै आवेदन नपर्नुले रास्वपाप्रतिको आकर्षण भौगोलिक रूपमा असमान रहेको देखाएको छ ।
तराईमा आकांक्षीको भीड, पहाडमा खडेरी
वडाध्यक्षका आकांक्षीको संख्यामा मोरङ सबैभन्दा अगाडि देखिएको छ । जिल्लाका १७ स्थानीय तहबाट ३२५ जनाले उम्मेदवार बन्न इच्छा देखाएका छन् । मोरङको धनपालथान गाउँपालिकामा मात्रै ३८ र कटहरी गाउँपालिकामा ३२ जनाले नाम दर्ता गराएका छन् ।
त्यस्तै, सुनसरीका १२ पालिकाबाट २६९, झापाका १५ पालिकाबाट २३६ र उदयपुरका सात पालिकाबाट १२९ जनाले आवेदन दिएका छन् ।
प्रदेशभरका पालिकामध्ये सुनसरीको भोक्राहा–नरसिंह गाउँपालिका सबैभन्दा अगाडि छ । त्यहाँ मात्रै ४७ जनाले वडाध्यक्षको उम्मेदवार बन्न नाम दर्ता गराएका छन् । उदयपुरको त्रियुगा नगरपालिकामा पनि ३९ जनाले आवेदन दिएका छन् ।
तराईका जिल्लामा आकांक्षीको संख्या उल्लेख्य देखिए पनि पहाडी जिल्लाका धेरै पालिकामा भने रास्वपाबाट वडाध्यक्ष बन्न चाहनेहरू भेटिएका छैनन् ।
ताप्लेजुङको फुङलिङ नगरपालिकासहित आठराई त्रिवेणी, मैवाखोला, मेरिङ्देन, फक्ताङलुङ, सिरिजंघा र पाथीभरा याङवरक गाउँपालिकामा वडाध्यक्षका लागि कसैले नाम दर्ता गराएका छैनन् ।
खोटाङको हलेसी तुवाचुङ नगरपालिका तथा ऐसेलुखर्क, बराहपोखरी, दिप्रुङ चुइचुम्मा, जन्तेढुंगा, केपिलासगढी र साकेला गाउँपालिकामा पनि अवस्था उस्तै छ ।
इलामका इलाम र देउमाई नगरपालिका तथा फाकफोकथुम, माङसेबुङ, रोङ र सन्दकपुर गाउँपालिकामा समेत वडाध्यक्षका आकांक्षी देखिएका छैनन् ।
पाँचथरको फिदिम नगरपालिका तथा हिलिहाङ, कुम्मायक, मिक्लाजुङ, तुम्बेवा र याङवरक गाउँपालिकामा पनि आवेदन परेको छैन ।
संखुवासभाका चैनपुर, मादी र पाँचखपन नगरपालिका तथा चिचिला, सभापोखरी र सिलिचोङ गाउँपालिकामा समेत रास्वपाबाट वडाध्यक्ष बन्न कसैले इच्छा देखाएका छैनन् ।
त्यस्तै, भोजपुरका आमचोक, हतुवागढी र रामप्रसाद राई गाउँपालिका, धनकुटाका चौबिसे, छथर जोरपाटी र साँगुरीगढी गाउँपालिकामा पनि आवेदन शून्य छ ।
सोलुखुम्बुको महाकुलुङ, तेह्रथुमको मेन्छ्यायेम र उदयपुरको सुनकोशी गाउँपालिकामा समेत वडाध्यक्षका आकांक्षी भेटिएका छैनन् ।
रवि लामिछानेले नै उठाएका थिए उम्मेदवार अभावको विषय
रास्वपाले आगामी स्थानीय तह निर्वाचनका लागि सम्भावित उम्मेदवार पहिचान र छनोट गर्न ‘क्यान्डिडेट क्लब’ सञ्चालन गरिरहेको छ । यही प्रक्रियामार्फत नाम दर्ता गराएका आकांक्षीमध्येबाट उम्मेदवार चयन गर्ने पार्टीको तयारी छ ।
तर, प्रमुख पदमा आकर्षण देखिए पनि वडाध्यक्ष बन्नेहरूको कमीले पार्टी नेतृत्वलाई चुनौती थपेको छ ।
रास्वपा सभापति रवि लामिछानेले समेत वडाध्यक्षका उम्मेदवारको अभावबारे सार्वजनिक रूपमा टिप्पणी गरेका थिए । केही दिनअघि चितवनमा आयोजित कार्यक्रममा उनले व्यङ्ग्य गर्दै ‘राजीनामा दिएर वडाध्यक्षमा लड्न आउनुपर्ला जस्तो छ’ भनेका थिए ।
कोशी प्रदेशमा एक हजारभन्दा बढीले वडाध्यक्ष बन्न इच्छा देखाउँदा पनि ४१ पालिकामा एक जना पनि आकांक्षी नदेखिनुले रास्वपाको स्थानीय तहसम्मको संगठनात्मक पहुँच र नेतृत्व विकासमा चुनौती रहेको संकेत गरेको छ ।
विशेषगरी पहाडी क्षेत्रमा देखिएको उम्मेदवार अभावले आगामी निर्वाचनअघि पार्टीलाई वडा तहसम्म संगठन विस्तार गर्ने र स्थानीय नेतृत्व तयार पार्ने दबाब बढाएको छ ।
प्रतिक्रिया