१ मंसिर, पथरी । मोरङको पथरी शनिश्चरे–२ स्थित कालीपानीमा प्रथम ऐतिहासिक कालापानी मिनी गोल्डकप २०८३ आयोजना हुने भएको छ ।
कालापानी युनाइटेड क्लबले भव्य प्रतियोगिता हुने बारेमा सोमबार पत्रकार सम्मेलन गरी जानकारी गराएको हो । क्लबको आयोजनामा आगामी मंसिर १२ गतेदेखि १९ गतेसम्म सञ्चालन हुने प्रतियोगितामा विभिन्न स्थानका ८ वटा टिमको सहभागिता रहने आयोजकले जनाएको छ ।
प्रतियोगिताको मुख्य प्रायोजक पथरी शनिश्चरे नगरपालिका वडा नं. २ को कार्यालय रहेको छ । प्रतियोगितामा प्रथम हुने टिमले नगद १ लाख १ हजार १११ रुपैयाँसहित ट्रफी, मेडल र प्रमाणपत्र प्राप्त गर्नेछ भने दोस्रो हुने टिमले नगद ५१ हजार १११ रुपैयाँसहित ट्रफी, मेडल र प्रमाणपत्र प्राप्त गर्ने आयोजकले जनाएको छ ।
पथरी शनिश्चरे –१ घरभएका हाल माल्टा बस्दै आएका शम्भु राईले प्रतियोगिताको प्रथम ट्रफीको सौजन्य गरेका छन् । त्यस्तै पथरी शनिश्चरे –२ घरभई हाल हङकङ् बस्दै आएका जितेन चोङबाङले प्रतियोगिताको दोस्रो ट्रफीको सौजन्य गरेका छन् ।
खेलकुदको विकास, स्थानीय प्रतिभाको पहिचान तथा युवाहरूलाई खेलकुद प्रति आकर्षित गर्ने उद्देश्यले प्रतियोगिता आयोजना गर्न लागिएको क्लब अध्यक्ष शंकर बुढाथोकीले जनाए ।




प्रतिक्रिया