२३ कार्तिक, पथरी । पथरी शनिश्चरे-१० मा स्थापना भएको समाज सुधार समितिले आगामी मंसिर १९ गतेदेखि मंसिर २९ गतेसम्म वडास्तरीय खुला फुटबल प्रतियोगिता आयोजना गर्ने भएको छ ।
समितिले आइतबार पथरीमा पत्रकार सम्मेलनको आयोजना गर्दै खेलहुने बारेमा जानकारी गराएको हो । युवाहरूलाई कुलतबाट बचाउने र खेलकुदप्रति आकर्षित गर्ने उद्देश्यले फुटबल प्रतियोगिता आयोजना गर्न लागेको आयोजकले जनाएको छ ।
प्रतियोगिता पथरीशनिश्चरे–१० स्थित प्रस्तावित नगर रंगशालामा खेल हुने संयोजक संजय नाछिरिङले बताए ।
उनले युवाहरूलाई लागू पदार्थको दुर्व्यसनबाट टाढा राख्न, खेलकुदमा जोड्न तथा प्रस्तावित रंगशालाको प्रचारप्रसार गर्ने मुख्य लक्ष्यसहित प्रतियोगिता आयोजना गर्न लागिएको बताए ।
प्रतियोगिताको आम्दानीको रकमबाट प्रस्तावित नगर रंगशालामा मञ्च निर्माण र घेराबाराको काम गरिने आयोजकले जनाएको छ। प्रतियोगिता सम्पन्न गर्न अनुमानित १० लाख रुपैयाँ खर्च लाग्ने बताए ।
प्रतियोगितामा कुल ११ वटा टिमले प्रतिस्पर्धा गर्नेछन्। जसमा पथरीशनिश्चरेका १० वटा वडा र एक भुटानी शरणार्थी शिविरको टिम ‘वाइ एफ सि’ को सहभागिता रहनेछ।
नियम अनुसार प्रत्येक टिमले वडाभित्रका ८ जना र बाहिरका ३ जनासम्म खेलाडी टिममा राख्न पाउने नियम रहेको छ। प्रतियोगिताको म्याच कमिश्नरको जिम्मेवारी कबिराज चेम्जोङले सम्हाल्नेछन्।
प्रतियोगितामा विजेता बन्ने टिमले नगद १ लाख १ हजार रुपैयाँसहित ट्रफी प्राप्त गर्नेछ भने उपविजेता टिमले ५१ हजार रुपैयाँ र ट्रफी हात पार्नेछ।
त्यसैगरी, विधागततर्फ उत्कृष्ट गोलरक्षक (किपर), उत्कृष्ट डिफेन्स, उत्कृष्ट मिडफिल्डर, उत्कृष्ट फरवर्ड र उत्कृष्ट कोचलाई समेत पुरस्कृतका साथै प्रतियोगितामा प्रत्येक दिन ‘म्यान अफ दि म्याच’ को समेत व्यवस्था गरिएको आयोजक समितिले जनाएको छ।
प्रतिक्रिया