जेठ ६ गते, पथरी । मोरङको पथरीशनिश्चरे–१० घर भएका व्यक्तिलाई कोशी अञ्चल अस्पताल विराटनगरमा गरिएको परीक्षण पछि कोरोना भाइरस संक्रमण पुष्टी भएको छ ।
मंगलबार भाइरस पुष्टी व्यक्ति सशस्त्र प्रहरीका हवल्दार रहेको पाइएको छ । उनी सुनसरीको पश्चिम कुसाहामा कार्यरत थिए । कुसाहा भारतको सीमा क्षेत्र हो ।
यससँगै संक्रमित हुने सुरक्षाकर्मीको संख्या पाँच पुगेको छ । यसअघि चार जना सुरक्षाकर्मी संक्रमित भइसकेका थिए ।
संक्रमण पुस्टि भएको खबरले अहिले पथरीशनिश्चरे नगरमा त्रास बढेको छ । यद्यपि, उनी लकडाउन सुरु हुनुअघि गत १० चैतमै घर आएर फर्किएको जानकारी आएको इलाका प्रहरी कार्यालय पथरीको प्रमुख डीएसपी दिलिपकुमार गिरीले बताए ।
उनको कन्ट्र्याक ट्रेसिङ आइनसकेको प्रहरीले जनाएको छ । ‘सशस्त्र प्रहरी हवल्दार करिब दुई महिनाअघि नै आएर सुनसरी फर्किएकाले नगरमा आतंकित भइहाल्नु पर्ने अवस्था छैन’, गिरीले भने, ‘घरैमा बसेर सुरक्षा अपनाउन जरुरी छ।’
