असार १५ गते, कानेपोखरी । मोरङको कानेपोखरी गाउँपालिकाले १९ औं राष्ट्रिय धान दिवस तथा रोपाई महोत्सव धान रोपेर मनाएको छ । बुधबार वडा नंं.– ३ को पाथिभरा कृषि तथा पशुपालन कृषक समूहको व्यवस्थापनमा धानको विऊ रोपेर धान दिवस मनाएको हो ।
धान रोप्नु अघि औपचारीक कार्यक्रम भएको थियो । कार्यक्रममा प्रमुख अतिथि गाउँपालिकाकी अध्यक्ष राजमती इङ्नामले गाउँपालिकाले कृषी क्षेत्रलाई प्राथमिकतामा राखेको बताइन् । कृषकहरुको लागि खेती गर्न आधुनिक औजारहरु अनुदानमा वितरण गर्ने, शितभण्डार, कोल्ड स्टोर, उत्कृष्ट कृषकलाई सम्मान जस्ता कार्यक्रम ल्याइएको बताइन् । कृषीलाई अर्गानिक तर्फ जोड दिने कुरामा विशेष जोड दिइन् ।
गाउँपालिका उपाध्यक्ष भोला अधिकारीले कृषी क्षेत्र तर्फ क्रमश सुधार गरी कृषी पेशालाई मर्यादित बनाउदै कृषकहरु आत्म निर्भर बनाउने गाउँपालिकाको लक्ष्य रहेको बताएका थिए । कृषी व्यवसायलाई व्यवसायीकरण गर्नको लागि नयाँ परियोजना ल्याएको बताए । कार्यक्रममा प्रमुखप्रशासकीय अधिकृत सन्तोष घिमिरे, वडा नम्बर २ का वडाध्यक्ष सुशिल बुढाथोकी, वडा नं. ४ का वडाध्यक्ष रमेश राउत लगाएतले बोलेका थिए । कार्यक्रममा वडा नं. ५ का वडाध्यक्ष खड्ग बस्नेत, जिन्सी शाखा प्रमुख यादव निरौला,कृषी शाखाबाट सागर पौडेल पनि उपस्थित रहेका थिए ।
पाथिभरा कृषि तथा पशुपालन कृषक समूहका अध्यक्ष तथा वडा नं. ३ का वडा अध्यक्ष गोपाल कार्कीको सभापतीत्वमा भएको कार्यक्रममा अधिकृत गोविन्द फुयलले कार्यक्रम संचालन गरेका थिए । कार्यक्रम समापन पछि दही, कोला, आँप र चिउरा खाएर धान रोपेका थिए ।
तस्विर : राजकुमारी तामाङ
